Rěčny centrum WITAJ a Ludowe nakładnistwo Domowina stej partneraj
Budyšin (SN/MiR). Rěčny centrum WITAJ bě sej předewzał zdźěłać za šulske lěto 2018/2019 w cyłku 31 titulow za wučbnu potrjebu. „Wšitke knihi, dźěłowe zešiwki, wuknjenske a wuwučowanske srědki su po planje spřihotowane. 29 z nich ma w ćišćanej formje hač do zahajenja šulskeho lěta 13. awgusta předležeć, štož wone z wěstosću budu“, rozłožuje wotrjadnica RCW za wučbnicy Annett Dźědźikowa. Dalše tři titule su wot wšeho spočatka za štwórty kwartal 2018 zaplanowanej.
RCW stara so kóžde lěto wo wobsahowe zdźěłanje wučbnych srědkow a přepoda je za zhotowjenje Ludowemu nakładnistwu Domowina, kotrež da po wupisanju jednotliwe titule do sadźboweho studija a ćišćernje.