Wo turněrje k 75. jubilejej Serbskeho gymnazija

Kajki bě to njewšědny spočatk wolejbuloweho turněra w sportowni Serbskeho šulskeho a zetkawanskeho centruma (SŠZC) w Budyšinje w ramiku swjatočnosćow k 75lětnemu wobstaću Serbskeho gymnazija Budyšin (SGB) Minjeny pjatk popołdnju je so w sprjewinym měsće tak mócnje kidało a hrimało, zo drohi płuwachu a krupy městnosć serbskeho kubłanišća na běły přestrjenc přeměnichu. A tola dojědźechu sej entuziasća wolejbuloweho sporta – dźewjeć cyłkow zhromadnje ze swójbnymi a fanami – do Budyšina, zo bychu wo pokal Spěchowanskeho towarstwa SGB wojowali. Do wotewrjenja turněra pomhachu najprjedy mnohe pilne ruki, mjez nimi tež šulski nawoda René Wjacławk, mokre blaki z hadrješćemi suche trěć. Bohudźak njeje so žadyn wolejbulist na tutym wječoru zranił.