Viktoria Worklecy I – Ochranowske wolejfantki 2:0 (25:14, 25:13)

Prěnje žónske wolejbulowe zastupnistwo Viktorije Worklecy měješe sobotu swoje pokalne finalne koło w domjacej ćěłozwučowarni we Worklecach. Sobotu do toho běchu so mjenujcy w połfinalnymaj hromaj přećiwo mustwomaj ze Zhorjelca kaž tež z Wojerec přesadźili.

W prěnjej hrě dnja běchu přećiwo Ochranowskim wolejfantkam nastupili. Wobsadka domjaceho mustwa bě minimalna. Dowola a chorosće dla pobrachowachu Worklečankam hrajerki. Jenož sydom wolejbulistkow bě so na pokalowym finalu wobdźěliło. Žony Viktorije zasadźichu liberu, z tym běchu wšitke pozicije jenož jónu wobsadźene a wuměna w nuznym padźe kaž na přikład při zranjenju njebě hižo móžna. Potajkim bě riziko wysoke, w najhóršim padźe z jenož pjeć hrajerkami na polu hrać směć.