Schadźowanka swójbow so prěni raz zwonka Chrósćic přewjedła
Radwor (SN/BŠe). Prěni raz w stawiznach schadźowanki swójbow je so zarjadowanje wčera w Radworju wotměło. „Zo schadźowanka po Hornjej Łužicy pućuje, bě přeće regionalnych rěčnikow župow Domowiny“, wujasni rěčna motiwatorka kónčiny wokoło Radworja Raphaela Wićazowa. Wězo je stajnje riziko, derje přiwzate stejnišćo kaž Chrósćicy wopušćić. „Tola jako pytnychmy, kelko akterow w Radworju podpěru přilubichu, běchu wobmyslenja z blida“, wuzběhny nawodnica Budyskeho Rěčneho centruma WITAJ Beata Brězanowa. Rěčny centrum je zhromadnje ze župu „Jan Arnošt Smoler“ Budyšin schadźowanku organizował. „Předewšěm chcu so Radworskej gmejnje za to dźakować, zo su nam wjacezaměrowu halu Slaviju přewostajili, štož njeje samozrozumliwe“, Beata Brězanowa při zazběhu zarjadowanja podšmórny.
