Swjedźeń demokratije dźensa na Bórkowskim kubłanišću „Mina Witkojc“

Bórkowy (dpa/SN/at). Na zakładnej a wyšej šuli „Mina Witkojc“ w błótowskich Bórkowach staj wučer Max Teske a wučerka Laura Nickel hromadźe z dalšimi pedagogami dźensniši swjedźeń demokratije organizowałoj. To njeje prěnjorjadnje reakcija na wozjewjenje prawicarskoekstremnych zjawow na kubłanišću před dwěmaj měsacomaj. Zarjadowanje bě hižo dlěši čas planowane, rjekny Teske powěsćerni dpa. Dźensa wotměchu so dźěłarnički, w kotrychž mjezykulturne předmjety rozjimachu. Na přikład su so wo ćěkancach runje tak wuměnjeli kaž wo „queer“-tematach. Wuknjacy mějachu nadawk, so na třoch workshopach wobdźělić, mjez druhim poskićachu tež tajki wo grafitijach. Pedagoga je wobkedźbował, zo je mało šulerjow, kotřiž so za temu diskriminaciju a prawicarski ekstremizm zajimuja. „Woni móža z temu ćežko wobchadźeć a no­chcedźa z njej do zwiska stajeni być.“ Trěbna je skónčnje podpěra ze stron ministerstwa. „My dale přećiwo zjawam w šuli wojujemy. Při tym njepopušćamy a njewuwjazamy ministerstwo ze zamołwitosće.