W Radworju wo přichodźe serbskeho šulstwa kontrowersnje diskutowali

Radwor (SN/MiP). „Wo kajkim serbskim šulstwje sonimy?“ – pod tutym hesłom steješe wčerawše druhe zarjadowanje w rjedźe lětušeje Serbskeje debaty, na kotrež běchu zarjadowarjo Sakska krajna centrala za politiske kubłanje, Serbske Nowiny a Załožba za serbski lud wčera wječor do Radworskeje Meje přeprosyli. Zo tema Serbow jima, to njepokaza jenož čiła diskusija mjez pjećomi fachowcami, kotruž je Bianka Šeferowa, naměstnica šefredaktora Serbskich Nowin, moderěrowała. Tež wulka ličba prašenjow a komentarow ze stron publikuma – něhdźe 50 ludźi bě w žurli, dalšich 30 online přitomnych – wo tym swědčeše.