W Budyšinje piktogramowe tafle připrawili

Budyšin (SN/mwe). Byrnjež temperatury tuchwilu hišće prawje lětnje njebyli, je drje tón abo tamny lětsa hižo do wody skočił: Tójšto kupjelow Sakskeje je swoju sezonu zahajiło, tak tež we wulkoměstach Lipsku, Kamjenicy a Drježdźanach. Prěni króć wisaja nětko w mnohich kupjelach comicsy z němsko-, jendźelsko- a arabskorěčnymi wobrazowymi podpisami. Na wjacorych wobrazach kupanske regule bjez wulkich słowow wujasnjeja – za domoródnych a ćěkancow, kotřiž čitać njemóža. Tak jich na to skedźbnjeja, zo je woda za tych, kotřiž płuwać njemóža, přehłuboka a strašna, a zo njeje kupanje w spódnjej drasće dowolene.