Za měšćansku radu, zarjadnistwo a za komunalne předewzaća města Wojerecy zdźěła tamniša serbska přirada nětko wosebitu přiručku, kotraž ma w serbskich prašenjach wažne pokiwy podawać.

Wojerecy (AK/SN). Dwurěčnosć we Wojerecach měła w měšćanskej radźe, w zarjadnistwje a w komunalnych předewzaćach prezentniša być. Sobudźěłaćerjo měli so za to bóle sensibilizować. Wo tym běchu sej wyši měšćanosta Stefan Skora (CDU) a čłonojo přirady za serbske naležnosće města na swojim wčerawšim posedźenju přezjedne. „Chcemy zhromadnje přiručku zdźěłać, kotraž ma při rozsudach pomhać a wotmołwy na wažne serbske prašenja wopřijeć“, rjekny předsyda serbskeje přirady Dirk Nasdala po posedźenju.