Minakał (HN/SN). Wobsedźer Minakałskeho hrodu Hermann Fuchs je kónc tydźenja na wupruwowane wašnje w hrodowym parku swjedźeń zetkanja organizował. Z darmotnym zastupom a bjez kóždehožkuli komerca chcyše wón pokazać, zo móžeš z dobrej organizaciju a z pomocu wobydlerjow rjany swjedźeń wuhotować. „Chětro rozšěrjenej njespokojnosći w našim kraju chcu z tym znapřećiwić, zo potencial ludźi budźu a dźěło na mnohe ramjenja rozdźělam“, Fuchs wuzběhny.
Dobru naladu mjez něhdźe 300 wopytowarjemi šěrješe sobotu wječor kapała mějićela hrodu. Hižo 52 lět wona hromadźe hudźi a hraješe tónraz přewažnje hity ze 60- a 70tych lět. Přiwšěm bě to zwjetša młódši publikum, kotremuž so hudźba lubješe. Wječor bě Minakałski hród přijomnje wobswětleny.
