Dobrowólni kameradojo su zdźěla spěšnišo na městnje hač powołanscy

Mały Wjelkow (CK/SN). Dwě lěće prjedy hač planowane dóstanje Małowjelkowska dobrowólna wohnjowa wobora nowe jězdźidło. Nic hakle 2019, ale hižo klětu ma wone do gratownje w Budyskim ­měšćanskim dźělu jěć, kaž měšćanscy ­radźićeljo na swojim zašłym posedźenju wobzamknychu. Awto je trěbne, zo ­bychu zasadźensku hotowosć wobory ­zawěsćili.

Spočatnje bě tankowe hašenske jězdźidło za transport wjetšeho mnóstwa wody a za hašenje předwidźane. Nětko pak budźe to tak mjenowane pomocne a hašenske jězdźidło HLF 10. Zasadźić móža je přidatnje při ćežkich wobchadnych njezbožach. Wobchada na zwjazkowej dróze B 96 a bliskeje awtodróhi A 4 dla je skerje móžno, zo wobornikow tam k pomocy wołaja. Tak móža Małowjelkowčenjo najprjedy raz samostatnje pomhać, prjedy hač dalši wobornicy přijědu. Přetož w zapadnych dźělach Budyšina su woni zdźěla spěšnišo na městnje hač powołanska wohnjowa wobora.