Gmejna Hamor wuwiće Bjerwałdskeho jězora dale pohonja. Na wčerawšej gmejnskej radźe informowaše wjesnjanosta Achim Junker (CDU) radźićelow wo aktualnym twarskim stawje infrastruktury.­

Hamor (AK/SN). „We wobłuku planowaneje twarskeje kónčiny Klětno-Jasua su w druhim dźělnym wotrězku infrastrukturne dźěła zahajene“, rozprawješe wčera Hamorski wjesnjanosta Achim Junker. „Po zemskich dźěłach a přihotowanju kanala za wodowody a wopłóčki móhli srjedź nowembra roły kłasć započeć.“

Dale přihotuje gmejna wuměnjenja za rozšěrjenje łódźnistwa na Bjerwałdskim jězoru. K tomu měł wjesnjanosta z Łužiskej a srjedźoněmskej towaršnosću hórnistwoweho zarjadnistwa (LMBV) wotpowědne zrěčenje wujednać. Tak płaći pasažěrska łódź, kajkuž chce gmejna na jězoru zasadźić, 876 000 eurow. 80 procentow toho chcedźa ze spěchowanskich srědkow Zwjazka financować. Zbytnych 20 procentow, štož wučinja něhdźe 180 000 eurow, ma Hamorska gmejna přewzać. Tole chcedźa do klětušeho etata zakótwić.