Kulow (AK/SN). Twar chódnika, ponowjenje kapałki a nowotwar mosta w tak mjenowanym zelenym lěsu běchu w delnich Sulšecach wažne naprawy minjeneho ­časa. To podšmórny w swojej rozprawje na zašłym posedźenju Kulowskeje měšćanskeje rady Jurij Brösan, kiž je dlěje hač 20 lět Sulšečanski wjesny předstejićer. „Z nowym chódnikom wěstota we wsy přiběra. Za šulerjow je wón runje tak wažny kaž za tych, kotřiž chcedźa do pěstowarnje“, praji wjesny předstejićer. Nowy móst bě nuznje trěbny. Stary bě wulka woda wobškodźiła. Swobodny stat Sakska je projekt stoprocentnje spěchował.