Budestecy (SN). 65 chłostanskich přizjewjenjow, 45 njeskutkow a cyłkowna škoda 68 000 eurow – to je bilanca 41lětneho wobšudnika z Budestec. Za to nětko w jastwje sedźi, kaž Zhorjelska policajska direkcija rozprawja.

W měrcu 2016 dyrbješe Budestečan prěni raz na lěto do jastwa, a to znjewužiwanja titulow a falšowanja wopismow dla. Zaso na swobodźe spožči sej wón měsacaj pozdźišo doktorski titul a je so zjawnje jako lěkar wudawał.

Dalše wobšudnistwa slědowachu kaž w filmje. Z wumyslenymi diagnozami so wón sam do chorownjow zapokaza, wudawajo mjez druhim lemjenja a schorjenja na raka w kónčnej fazy. Wjacore razy prócowaše so wo swójske zapokazanje do hladanskich zarjadnišćow, byrnjež žaneje­ přičiny njebyło. Jeho stawiznički běchu runje tak wunamakane kaž sa­mospaslene zapokazanske wopisma.

Dale skaza wón twory a posłužby, kotrež pak njezapłaći, mjez druhim wino a techniske nastroje. Samo bydlenje da sej dospołnje ponowić. Zo rjemjeslnicy za to žane pjenjezy njedóstachu, bě jemu wšojedne.