Radźićeljo wo přiražce we wobjimje 5 000 eurow diskutowali
Kulow (AK/SN). Wjace hač 200 čłonow wopřijace sportowe towarstwo DJK Běło-módri Kulow chce swoje dotalne sanitarne a socialne twarjenje wottorhać a znowa natwarić. Tole chce město z přiražku 5 000 eurow podpěrać, kaž měšćanscy radźićeljo na swojim zašłym posedźenju wobzamknychu.
„Naprawa chwata. Trenarjo a hrajerjo su hižo započeli socialny dźěl wurumować“, wuzběhny čłon předsydstwa towarstwa Sören Börner. Za twar angažuje so tež bywši Kulowski měšćanosta Udo Popjela. Předewzaće płaći dohromady 145 000 eurow. Towarstwo prócuje so wo spěchowanske srědki z programa Leader. Próstwu tuchwilu wobdźěłuja, tak zo nadźijeja so na 75procentowske spěchowanje. To by nimale 110 000 eurow było. Zbytk chce towarstwo ze swójskimi srědkami, z darami, z pomocu sponsorow a z komunalnej přiražku zwjesć.