Tysacy swójbow na horcych dnjach so dotal přewšo derje wočerstwiło

Budyšin (SN/mwe). W Budyskej Sprje­wi­nej kupjeli registrowachu w lětušej se­zonje, kotraž bě so 1. junija zahajiła, hač do kónca julija něhdźe 23 500 wopytowarjow. To je něhdźe tysac wjace hač loni w samsnym času. Diana Liebsch z Budyskeje wobdźělenskeje a wobhospodarjenskeje towaršnosće (BBB), za wudźeržo­wanje kupjele zamołwiteje, zdźěli našemu wječornikej: „Naše mustwo wobsteji z płuwanskich mištrow a fachowcow za ku­panske zawody – smy pjećo a wučomnik. Přidatnje nas wuchowanscy płuwarjo Němskeho čerwjeneho křiža a Němskeje towaršnosće za wuchowanje žiwjenja podpěruja. Woni so w změnje wo dohladowanje kupacych a hladanje techniskich připrawow staraja.“ Kasowy wobłuk a rjedźenje sanitarnych připrawow eksterna posłužbowa firma zamołwja. Nimo mjeńšich zranjenjow kaž rěznjenjow, problemow z wobtokom kreje abo kałnjenja insektow dla njemějachu w Budyskej Sprjewinej kupjeli žane starosće. Kiosk zaruča ćělne derjeměće tysacow wopytowarjow. Wupožčić móža sej tam tež słónčenske lěhadła.