Łaz (AK/SN). Sewjernje Šibojskeho jězora, hdźež hižo wjacore milinowe wětrniki steja, ma wulka fotowoltaiska připrawa nastać. K tomu je so předwčerawšim Łazowska gmejnska rada wuznała. Jeje čłonojo su nastajenju twarskeho plana „Solarny park Šiboj“ jednohłósnje přihłosowali. Planowanska kónčina wupřestrěwa so na wuchodźe hač k Małej Sprjewi, na sewjeru hač k lěsej, na zapadźe hač ke gmejnskej hranicy a na juhu hač k wokrjesnej dróze K 9218.
„Mějićel chce płoninu wobhospodarjeć“, rozłoži Łazowski wjesnjanosta Thomas Leberecht (CDU). „Z twarskim planom stanje so to legitimne. Za cyły zarjadniski proces wotzamknjemy zrěčenje, zo gmejnje žane wudawki njenastanu.“ Wobsedźer płoniny je firma z Regensburga. Wona chce dalšu energiju z wobnowjomnych žórłow wudobywać. Za to ma so wobswětowe pruwowanje přewjesć, kotrež budźe wažny wobstatk posudka, hač smědźa projekt po planje zwoprawdźić. Regensburgske předewzaće ma to runje tak zapłaćić kaž wšitke zarjadniske a wotkrywanske kóšty, wuzběhny twarski nawoda gmejny Wolfgang Tietze.
