Wojerecy (AK/SN). 25 lět po smjerći sławneho syna Wojerec Konrada Zusy a 25 lět po tym zo su jemu čestne měšćanstwo spožčili, wuznamjeni město lětsa syna wunamakarja kompjutera prof. Horsta Zusu z Konrada Zusowej plaketu města Wojerec. To je tamniša měšćanska rada na swojej njedawnej zhromadźiznje jednohłósnje rozsudźiła. Myto spožča město kóždej dwě lěće wosobinam, kotrež maja wulke zasłužby při hajenju a šěrjenju namrěwstwa čestneho wobydlerja Konrada Zusy. Naposledk běchu Horsta-Dietera Brähmiga z plaketu wuznamjenili. Wón bě wot lěta 1994 do 2006 Wojerowski wyši měšćanosta.
Prof. Horst Zuse, syn wunamakarja kompjutera, narodźi so 1945 w Hindelangu w schwabskim wokrjesu Oberallgäu w Bayerskej njedaloko Oberstdorfa. Po šulskim wukubłanju a maturje studowaše wón elektrotechniku na Techniskej uniwersiće Berlin a zakónči studij z diplomom. Lěta 1983 promowowaše wón na diplomoweho inženjera a 1998 habilitowaše na Berlinskej TU wuspěšnje za praktisku informatiku. Fachowa wysoka šula Łužica Zły Komorow powoła jeho 2006 za honorarneho profesora a tři lěta pozdźišo samo za profesora.