Radźićeljo nadawk za planowanje nowotwara pěstowarnje přepodali
Slepo (AK/SN). Hač do lěta 2022 ma wosrjedź Rownoho nowa Witaj-pěstowarnja „Milenka“ nastać. Na swojim wčerawšim posedźenju přepoda Slepjanska gmejnska rada planowanske dźěła Běłowodźanskemu architekturnemu běrowej.
Nastać ma dźěćace přebywanišćo blisko Njepilic statoka na ležownosći něhdyšeho hosćenca napřećo wohnjowobornej wěži. Wone stanje so tak dźěl přichodneho serbskeho wjesneho centruma Rownoho. Kubłanišćo změje 60 městnow, tuchwilne wopřijima 44. Dohromady ma nowotwar 1,5 milionow eurow płaćić. Najwjetši dźěl kóštow zwjedźe energijowy koncern LEAG. Swobodny stat Sakska přewozmje gmejnski podźěl. Nowa pěstowarnja je jedna ze štyrjoch naprawow zrěčenja swobodneho stata, Slepjanskeje a Trjebinskeje gmejny, Zhorjelskeho wokrjesa a LEAG. Z nim maja so nachwatać inwesticije po změnjenym rewěrowym koncepće koncerna.
