Younes Polenz z Niskeje stara so wot ­lětušeje sezony wo serwisowe zarjadnišća při woblubowanym wočerstwjenišću. Z kioskom planuje wón něšto cyle wosebite.

Zubornička (UM/SN). W minjenych tydźenjach móžachu wuchodźowarjo při Olbje časćišo muža wobkedźbować, kiž pódla kioska pěsk rozdźěleše. Bě to Younes Polenz, kiž so wot lětušeje sezony wo zastaranje wopytowarjow při kupanišću stara. Swjatkowničku je najprjedy předawanišćo zakuskow a pobrjóžnu baru ­wočinił. Tule chce wón w běhu sezony wjacore zarjadowanja přewjesć, kotrež do toho ze susodnym přirodnym stanowanišćom a Malešanskej gmejnu dorěči. Z woběmaj je nowy mějićel kioska hižo wuši kontakt nawjazał a čuje so tule „super witany“. Wšako ma přichodna kombinacija z předawanišćom zakuskow, pobrjóžnej baru a kioskom atraktiwne městno za wšědne zastaranje skićić. ­A k Malešanskemu wjesnjanosće Mat­thiasej Seidelej (CDU) je Younes Polenz hnydom dobry zwisk namakał. „Wón je za moje ideje wotewrjeny a je mi pomoc přilubił, hdźežkuli ju trjebam.“