Tema připućowanje dźěłowych mocow je na njedawnej Łužiskej konferency DGB wažnu rólu hrała. Krótko na to je so komunalne zwjazkarstwo Łužiske koło tež z tym zaběrało.

Wojerecy/Běła Woda (SN/at). Přińć a wostać, jenož tak móže so změna strukturow we Łužicy radźić. To snadź je hłowne poselstwo lětušeho třećeho schadźowanja Łužiskeho koła minjeny štwórtk we Wojerecach. Brizancy temy připućowanja dla běše sakske hospodarske ministerstwo na zetkanju we Wojerecach derje zastupjene. Jeho statna sekretarka Ines Fröhlich zawodnje wuzběhny, zo je dalše wuske strategiske a krajej přesahowace zhromadne dźěło mjez komunami a krajnymaj knježerstwomaj trěbne. Fröhlich wuraznje chwaleše něšto dnjow po wopyće delegacije Łužiskeho koła pola zwjazkoweho ministra za hospodarstwo a klimu Roberta Habecka (Zeleni) w Berlinje iniciatiwu, tež ze zwjazkowej politiku so direktnje rozmołwjeć.