Třo kandidaća nastupja lětsa k wólbam wyšeho měšćanosty w Běłej Wodźe

Běła Woda (AK/SN). K wólbam do zastojnstwa wyšeho měšćanosty w Běłej Wodźe, lětsa 1. septembra, powabja so žonje a muž. Wotpowědnu kandidatnu lisćinu je tamniši wólbny wuběrk póndźelu schwalił. Wólby su trěbne, dokelž so druha wólbna doba amtěrowaceho wyšeho měšćanosty Torstena Pötzscha (wolerske zjednoćenstwo Klartext) kónči. Po 14 lětach w zastojnstwje wón ze strowotnych, swójbnych a politiskich přičin hižo znowa njekandiduje, tak běše njedawno zdźělił.