Kiosk při wočerstwjenišću njedaloko Olby wabi pozastać

Zubornička (UM/SN). Younes Polenz, wobhospodar zakuskoweho kioska w Zuborničce, je w běhu swojeje prěnjeje sezony tójšto nazhonjenjow nazběrał. W zymskej přestawce běše wón inwestował, zo by kiosk lětsa wuspěšniši był. „2023 běše lěto, w kotrymž sym wjele nawuknył, ale tež někotryžkuli zmylk činił“, Nišćan wuznawa. Wón běše z předawanskim kioskom, zakuskowym kioskom a beachbaru startował – zwostał je jemu na kóncu zakuskowy kiosk. „Běch twarjenje, tak kaž wone bě, wot swojeho předchadnika přewzał. Tola hižo bórze pytnych, zo wuměnjenja mojim narokam njewotpowěduja.“ Rum běše jara wobmjezowany. Při připrawjenju jědźow je so personal lědma pohibować móhł. Ludźo su dyrbjeli dołho na swoju skazanku čakać. „To je někotrehožkuli kupca jara zamjerzało. Mój personal wšak je najebać špatne wobstejnosće přeco derje dźěłał.“