Filmowy open-air w Čornym Chołmcu je nimo.
Čorny Chołmc (SN/MiR). Wjace hač 5 000 wopytowarkow a wopytowarjow je lětsa składnosć wužiło, sej film w Čornochołmčanskim Krabatowym młynje wobhladać. Na jednym boku běchu organizatorojo přihódny program filmowych nocow přihotowali, na tamnym pak wabjachu tež bjezdwěla lěpše wuměnjenja, filmy na sćěnowinje sćěhować móc. Prěni króć běchu tam trawersy ze stólcami stajili a mjez rynkami bě telko městna, zo tež wjetši ludźo derje sedźachu. Pjeć króć dźesać metrow wulka płachta bě šěroka dosć, zo kóždy wšitko widźeše. Přez cyłu sezonu su mnozy fanojo kina pod hołym njebjom poskitk wužiwali a sej wosebitu atmosferu pod hwězdnym njebjom spodobać dali.
