W muzeju w Zagorju swojoraznu wustajeńcu wotewrěli

Zagor (JR/SN). „Policija – Twój přećel a pomocnik“, tak rěka nowa wustajeńca, kotruž su njedźelu w muzeju za rjemjesło a přemysło w Zagorju wotewrěli. W fokusu wustajeńcy steji něhdyši społno­mócnjeny we wotrězku (ABV) w gmejnje Krušwicy Fritz Hübner, kotryž je móhłrjec prototyp policista NDR. Wustajeńca wobswětluje stawizny policije w NDRskim ­času a wozmje wopytowarja sobu na pućowanje po tutej dobje. Cyłe lěto je wona nětko w přistupna.

„Ideju za wustajeńcu su Krušwičenjo sami měli“, powěda Helga Heinze, orga­nizatorka wustajeńcy a hižo přez lětdźesatki angažowana čłonka předsydstwa spěchowanskeho towarstwa muzeja. „Wot spočatka sem su nam tójšto wosobinskich dožiwjenjow z Fritzom Hübnerom powědali, kotrež su nětko tež dźěl wustajeńcy“, wona doda. Při přihotach poboku je jej wjesna chronistka Bettina Tóth była, Helga Heinze naspomni. Wona je so ze swójbu Fritza Hübnera skontaktowała a eksponaty ze zawostajenstwa organizowała. Zdobom je wona archiwy za fotami a nowinskimi artiklemi přeslědźiła.