Z tutym rjadom přinoškow chcemy wam měsačnje poručeć, što móžeće w zahrodce abo w rostlinarni zdokonjeć. Přejemy wam wjeselo při dźěle a radosć při wobkedźbowanju toho, štož pod wašimaj rukomaj rosće.
Wětřikec hólcy su nam zdźěla hižo sylnje zaduli a chłódniše temperatury přinjesli. Nazyma tu je a prěnje dny winowca njeběchu za zahrodkarja abo zahrodkarku runjewon jara wabjace. Je pak hišće tójšto, štož móhli a dyrbjeli do zymy w zahrodce hišće zrjadować. Tak mamy nětko móžnosć, kobołk do swojich hrjadkow tykać, wotwisnje wot toho, kotru družinu mamy hač do kónca měsaca abo samo hišće do spočatka nowembra zwosadźeć. Nětko w nazymje hodźa so za to wosebje družiny germidour, thermidrome abo messidor. Wone su jara robustne a wunošne a maja rjanu fijałkojto-běłu barbu. Při tykanju dyrbiš wotstawk něhdźe 20 cm mjez jednotliwymi stawčkami (Knoblauchzehen) dodźeržeć.
