Na nazymskich burskich wikach w Slepom kirbs lětsa w srjedźišću stał

Slepo (JoS/SN). Čłonojo organizaciskeho teama kołowokoło Sylwije Panošineje ze Slepjanskeho Serbskeho kulturneho centruma su njedźelu ruce połnej dźěła měli. Při najlěpšim nazymskim wjedrje běše wjace hač tysac ludźi na nazymske kirbsowe wiki přichwatało. Planowali wšak su zarjadowanje poprawom jako kermušne wiki, na kotrychž chcyše pomologa Klaus Schwartz z Lubija we wulkej přehladce wopytowarjam jabłukowe družiny předstajić. Tón pak je lětušich hubjenych ­jabłukowych žnjow dla hižo w lěću wotprajił.

Pragmatisce rozsudźichu w Slepom, zo dóstanje tamny nazymski płód na wikach swoje prominentne městno: kirbs. „Hladajo na to mamy lětsa jara wunošne žně, wšako kirbsy za čas zmjerzkow w nalěću kćenja hišće wutworili njeběchu“, powěda Sylwija Panošina. Najwjetši, 205 kilogramow ćežki kirbs je Slepjan Ronny König wotedał. Tutón hoberski płód je nazymsce wupyšeny w nutřkownym dworje kulturneho centruma swoje „čestne městno“ dóstał.