Hudźbne trio w cyrkwi swj. Pětra nabožnokulturnu wurywanku předstajił

Budyšin (CRM/SN). W rjedźe Duchowna hudźba w tachantskej cyrkwi steješe minjenu njedźelu něšto porědko słyšane na programje. Tachantskemu kan­torej Kamilej Maksymilianej Kulawikej běše so poradźiło, hudźbne duo Anne-Susi Enßle a Philipp Lamprecht zdobyć a ze Susannu Ansorg rozšěri so duo wo dalšu instrumentalistku. Tući třo předstajichu w nyšporje, na kotrymž poda kapłan Pětr Mróz wotpowědnu meditaciju, hudźbu ze 14. lětstotka w Salzburgu – potajkim za čas tamnišeho wuměłstwo doraznje spěchowaceho biskopa Pilgrima II.

Tak zaklinča jako wosebje hódnotny přikład z woneje doby „Nikodemusowy pasion“. Je to wopisanje ćerpjenja Jězusa Chrystusa, přisłušace k tak mjenowanym apogryfnym tekstam – nabožnym tekstam z časa 200 do 400 lět po Chrystusu, kotrež njejsu do Noweho zakonja zapřijate. Kompozicija z hłuboko za­čuwanym wobsahom pochadźa wot anonymneho „Mnicha z Augsburga“, kiž zawostaji někak pjećdźesat nabožnych a runje tak wjele swětnych hudźbnych twórbow.