Čłonojo Wojerowskeho zjednoćenstwa „OPEN Deck Lausitz“ njehorja so jenož za šrubowanje na swojich awtach, woni su tež na socialnym polu přewšo angažowani.

Wojerecy (SiR/SN). Wulke wjeselo mějachu młodźi wobydlerjo Wojerowskeho dźěćaceho a młodźinskeho centruma (KJZ) w nošerstwje Dźěłaćerskeho dobroćelstwoweho skutka (AWO) na swojim nazymskim swjedźenju. To njezadźiwa, wšako běchu kubłarjo wulki skakanski hród natwarili a so wo tójšto zajimawe zabawy, kaž na přikład rězbarjenje kirbsow, postarali. Wosebići hosćo na tutym dnju wšak běchu čłonojo zajimoweho zwjazka „Open Deck Lausitz“.

14 muži a žony zjednoćenstwa zwjazuje lubosć k jězdźidłam. Na poslednjej „Auto Convetion“ – zjězdźe lubowarjow awtow, kotryž běše so při Wojerowskim Łužiskim centerje wot­měwał – su pjenjezy za powšitkownowužitne zaměry hromadźili. Na kóncu su dohromady 1 500 eurow nazběrali. Połojcu sumy přepodachu nětko KJZ. „Nad pjenježnym darom so jara wjeselimy. Wšako naš budget za kulturne zaměry wulki njeje“, praji nawod­nica zarjadnišća Julia Grenzemann hladajo na pjenježny dar.