Gmejnska rada Ralbicy-Róžant wustawki za wažne dźěła přichoda schwaliła

Ralbicy (JK/SN). Gmejnska rada gmejny Ralbicy-Róžant bě so zaso w Ralbičanskej starej šuli k swojemu posedźenju zetkała. K zahajenju poda komornica Franciska Čapkowa přehlad wo wuwiću pozi­cijow lětušeho hospodarskeho plana. ­Pola wudawkow je gmejna směrnicy spjelniła, dźakowano połnemu wurunanju přidatnych wudawkow za nowotwar Ralbičanskeje pěstowarnje. Sakska spěchowanska banka je, kaž SN hižo rozprawjachu, wšitke dodatne wudawki w połnej wysokosći spěchowała. Najebać to pak je gmejna dale namołwjena, zlutniwje hospodarić. K tomu přinošować ­budu nowe wustawki k zakładnym dawkam w gmejnje. Tute su zakład za klětuše zwyšenja resp. rjadowanje dawkow. Diskusija mjez radźićelemi w zwisku z temu bě kontrowersna, wosebje hladajo na wysokosć dawkow a na sumu zwyšenja. Přitomny předsyda zarjadniskeho zwjazka „Při ­Klóšterskej wodźe“ Stefan Anders wobkrući radźićelam, zo móže so zakładny dawk hač do 30. junija klětu skorigować.