Na wšěch 200 kolesowarjow a 70 młodych běharjow ze wšeje Němskeje je so minjenu sobotu w Radworju wubědźowało. Wabiła je jich crossowa čara w lěsu při tamnišim sportnišću.

Radwor (SN/MkWj). Na dobru tradiciju wuwiło je so crossowe wubědźowanje kolesowarjow a běharjow w Radworju, stajnje posledni kónc tydźenja w oktobru. Kruće zakótwjene w terminowym kalendrje Budyskeho towarstwa kolesoweho sporta RSV přiwabja event mjeztym sportowcow zbliska a zdaloka, štož so na čisłowych tafličkach awtow widźomnje wotbłyšćuje.

Wobdźělnicy waža sej po swójskich wuprajenjach naročnu čaru po lěsu při Radworskim sportnišću w susodstwje kupoweho hata, kotremuž praja domoródni hač do dźensnišeho „zwěrjenc“.