Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow prócuja. K tomu přinošować chce naša serija z pokiwami z weterinarneje mediciny. (44)
Měd chwalimy sej jako słódkosć, jako hojacu pomoc přećiwo chorosćam atd. Za wuspěšnu produkciju mjedu pak je sylny a strowy pčolacy lud njeparujomny. Wobswět pak pčoły přiběrajcy wužaduje. Ale tež chorosće so do kołćow dóstawaja.
Jedna z najčasćišich starosćow pčołarjow je varroa-roztoč. Parazit je jenož něhdźe milimeter króć połdra milimetra wulki, móže pak wosebje we wjetšim mnóstwje cyły lud pčołow zničić. Kaž Němski pčolacy monitoring informuje, zahinje kóžde lěto něhdźe 10 do 15 procentow wšěch ludow pčołow přez roztoča.
Varroa-roztoč je prěni króć 1967 w Europje zachadźał, a to w Bołharskej. Pozdatnje bě so njekmanik z importowanymi pčolacymi ludami z wuchodneje Azije do Europy dóstał.
