Budyska nakupowanska nóc Romantika tysacy wopytowarjow přiwabiła

Budyšin (CS/SN). Lětuša Budyska Romantika měješe předwčerawšim popołdnju rjany serbski zazběh z wernisažu Nowowješćanskeho drjeworězbarja Mikławša Dyrlicha w rumnosćach Serbskeje kulturneje informacije w Serbskim domje. Je to hižo třeći serbski wuměłski rjemjeslnik, kotrehož twórby tam zjawnosći předstajeja. Nic jeno Serbam derje znaty drje je Mikławš Dyrlich swojich drjewjanych běło-złotych narownych křižow na Ralbičanskim kěrchowje dla. Dohromady je něhdźe 600 tajkich w swojim wuměłsko-rjemjeslniskim žiwjenju stworił, kaž sam rjekny. Wón je dźěłarnju swojeho nana přewzał a wjedźe rězbarsku tradiciju swójby dale. Nadawki wšak dochadźeja z cyłeho swěta k njemu, samo za Vatikan je hižo dźěłał. Sobotu běše jeho tež bratr, basnik a awtor Benedikt Dyrlich, na wotewrjenje wustajeńcy přewodźał. Wón předstaji publikumej swój essay „Rězbarske wuměłstwo mojeho nana“, a to w serbskej runje tak kaž w němskej wersiji.