Na Serbskim gymnaziju informuja wutoru wobšěrnje wo Bretonach

Budyšin (SN/MiP). Wučerjo a šulerjo Budyskeho Serbskeho gymnazija maja w tutych dnjach ruce połne dźěła, dokelž hižo přichodnu wutoru zaso tak daloko je: Dźeń wotewrjenych duri.

Yvonne Bulišowa, wučerka francošćiny na gymnaziju, kotraž je zdobom za pěstowanje stykow k partnerskej šuli w Bretoniskej zamołwita, je sej ze swojimi šulerjemi za tutón dźeń wosebity poskitk přemysliła. Pod hesłom „dorioù digor“, štož rěka „wotewrjene durje“ w bretonšćinje, změja cyłu stwu z informacijemi najwšelakorišeho razu wo bretoniskej kulturje wuhotowanu, kotrež su sej w mjezsobnej wuměnje „nazběrali“.