Njebjelčanscy starši maja wot klětušeho wjace za žłobik a pěstowarnju płaćić
Njebjelčicy (JK/SN). Wědźo, zo steji jim woda hač k šiji, mějachu gmejnscy radźićeljo w Njebjelčicach na wčerawšim posedźenju wo njelubych zwyšenjach wšelakich popłatkow wuradźować. Někotre su samo wobzamknyli. Wosebje ćežki běše rozsud nastupajo staršiski podźěl za wudźeržowanje Njebjelčanskeho žłobika a pěstowarnje. Wotličenje zawodnych kóštow nošerja pokazuje, zo su wudawki gmejny znowa eksorbitantnje stupali a zo dyrbi gmejna tohodla podźěl popłatka staršich zwyšić. Swobodny stat Sakska podawa za tutón pad wěste měrika za wobličenje tutoho podźěla a postaji samo maksimalnu wysokosć. Komornica gmejny bě hladajo na dezolatny financny staw namjetowała, staršiski podźěl hač do maksimuma zwyšić. To pak wjesnjanosta André Bulank (njestronjan) wotpokaza, dokelž nochcyše staršim enormne zwyšenje popłatka přicpěwać. Wón namjetowaše gmejnskej radźe łahodnje postupować a popłatk w znjesliwej měrje zwyšić. Tomu rada přihłosowaše a wobzamkny, klětu wot 1.
