Radwor (SN/VaŽ). W zhromadnym dźěle Radworskeho młodźinskeho kluba „Radworske“ a staršiskeje iniciatiwy Radwor přewjedźechu minjeny pjatk kinowe zarjadowanje w klubje. Hižo šesty raz organizowaše młodźinski klub tajke zetkanje, při čimž bě to štwórty raz, zo so tež dźěći wobdźělichu. Něhdźe 30 dźěći z Radworja a wokoliny, mjez druhim tež z Budyšina a Worklec, wobhlada sej zhromadnje kanadiski dźěćacy film „Peeweeje – Mišterstwa na lodźe“ w serbskej rěči.
Dokelž přewjedźechu kino lětsa hakle w adwenće, sedźachu dźěći tónraz nutřka při ćopłym kaminje. W młodych mjezwočach so zajim za film jara wotbłyšćowaše. Dźesaćlětna Alena Dźisławkec bě zahorjena a připowědźi, zo sej film na swojich přichodnych dźěćacych narodninach z přećelkami znowa wobhlada. Wosebje lubješe so jej napjata atmosfera a kak su wšitke dźěći za prawe mustwo w duchu sobu wojowali. Zo by zarjadowanje awtentiske kinowe dožiwjenje skićiło, postara so młodźinski klub wo čerstwy popcorn, kołbaski a horce napoje. Zastup bě darmotny. Tak bě zarjadowanje wšitkim přistupne.
