W Jaseńcy jědnaty raz beneficny koncert zarjadowali

Jaseńca (fk/SN). Na dwěsćě ludźi zeńdźe so sobotu wječor w Jaseńcy na hižo jědnaty beneficny koncert. Wuhotowałoj stej jón skupinje PoŠtyrjoch a Wólbernosće. Znaty muski kwartet zahaji wječor ze šibale přepisanym Adeste fideles: „Atesty za spěwanje njetrjebaće dźensa w Budarjec bróžni, nětko poskajće! (…) Tuž prošu šćedrje dajće, projekty podpěrajće na ­beneficnym wječorku we Jaseńcy!“ Mjeztym zo wotmě so zarjadowanje zašłych dźesać króć na Rynčec statoku, běštaj lětsa prěni króć Budarjec mandźelskaj Marija a Bernd hosćićelej. Hromadźe ze šwitu pomocnikow běštaj bróžnju a stan wulkotnje wupyšiłoj. W přitulnej atmosferje, ke kotrejž přinošowaše w derje wutepjenej rumnosći tež na sćěnu projicěrowany wohenčk w kaminje, zanjese muska spěwna štwórtka najprjedy wěnčk znatych adwentnych kěrlušow a spěwow. Spěwarjo zamóchu připosłucharjam z čućiwymi interpre­tacijemi měrnych pěsnjow prawu do­hodownu naladu nakuzłać.