Budyšin (CRM/SN). Kaž je hižo dołho z tradiciju, tak přeprosy Serbski ludowy ansambl tež lětsa zaso na woblubowany silwesterski koncert. Zastupne lisćiki za popołdniše kaž tež za wječorne zarjadowanje běchu hižo w předpředani rozebrane. Předewšěm staršej měšćanskej generaciji je tutón termin wažny, ale tež zajimcy ze serbskich wsow sej na kóždolětny klasiski hudźbny wohnjostroj rady do města dojědu.
Dirigowany wot Kathariny Dickopf zanjese orchester hnydom pjeć kompozicijow Johanna Straußa młódšeho, kotrehož 200. posmjertne narodniny lětsa wopominamy. Jeho opereće „Njetopyr“ a „Cyganski baron“ dźě słušatej do najwoblubowanišich operetow scyła, a tak zaklinčachu wurězki z tuteju popularneju twórbow hižo w prěnim dźělu koncertneho programa. Ale tež kompozicije Roberta Stolza, Franza Lehàra abo tež Emmericha Kalmana publikum parować njetrjebaše. Spěwnej solistaj Jessica Leao (sopran) a Kyle Fearon-Wilson (tenor) spjelništaj swój nadawk z brawuru a žněještaj wjele přikleska.
