Skupina Serbow sej do čěskeje stolicy wulećała

Praha (SN/WŽ). Na Karlowym mosće w Praze je lětsa skupina Serbow zhromadnje nowe lěto witała. Wjac hač 40 zajimcow, mjez nimi horstka młodostnych, wobdźěli so na silwesterskej wuprawje towarstwa Cyrila a Metoda do čěskeje stolicy. Bus Šmitec wozydłownistwa dowjeze jich do města, hdźež mějachu swój kwartěr centralnje w hotelu blisko Wjacsławskeho naměsta. Zhromadnu wječer wobrubi farar Praskeje katolskeje němskorěčneje wosady Lothar Vierhock ze zajimawej přehladku wo swojim duchownym skutkowanju. Prjedy hač je nazymu 2023 do Prahi přišoł, bě dlěši čas w Hongkongu a Moskwje za tam bydlacych němskorěčnych katolskich wěriwych zamołwity. Tola tež Łužica a tudyše křesćanske žiwjenje farar Vierhock derje znaje a tak so w bjesadźe ze Serbami ta abo tamna anekdota dopowěda. Danko Handrik, kiž bě jězbu zhromadnje ze swojej mandźelskej Danielu spřihotował, zmóžni zajimcam dohlad do studija ARD, hdźež ma jako wukrajny korespondent sćelaka swoje dźěłowe městno.