Hamor (AK/SN). Zhorjelski wokrjes chce swój dom za požadarjow azyla w bywšej powołanskej šuli w Hamorskej milinarni hač do meje 2026 dale wjesć. To je lěto dlěje hač spočatnje planowane. Tole zdźěli nawoda zarjada za porjad Zhorjelskeho wokrjesa Falk Werner Orgus wčera na posedźenju Hamorskeje gmejnskeje rady. Pozadk je, zo njeje wokrjes dotal druhi kmany dom w Běłej Wodźe abo wokolinje namakał. Tež za bydlenjemi, w kotrychž móhli požadarjow azyla decentralnje zaměstnić, su dotal podarmo pytali.

W juniju 2023 je Zhorjelski wokrjes w Hamoru prěnich požadarjow azyla zaměstnił. Spočatnje bydleše tam 40 ludźi. W januaru 2024 bě kapacita 150 městnow dospołnje wučerpana. Dohromady bydleše tam wjace hač 230 ludźi ze Syriskeje a Turkowskeje.

Nětko, w prěnim kwartalu 2025, chce wokrjes imobiliju energijowemu koncernej LEAG předać. Hač do meje 2026 pak smědźa tam dale požadarjow azyla zaměstnić. Hakle potom chce energijowy koncern do domu inwestować a jón za swójske zaměry wužiwać.