Radwor (SN/MkWj). Stólcy nosyć dyrbjachu předwčerawšim póndźelu, w Radworskim Słodenku. Tójšto ludźi bě přeprošenju tamnišeho chóra Meja na filmowy wječor do swojeho domicila w rumnosći bywšeje lutowarnje sćěhowało. Rumnosć wužiwaja stajnje zaso tež za druhe zarjadowanja. Na wječork přeprosyłoj běštaj Beno Bělk a Bosćij Handrik.
Hladajo na zachowanje wjesnych stawiznow su Radworčenjo w dosć dobrym połoženju. Beno Bělk hižo wjele lět wšitko zběra, štož ze stawiznami wsy a gmejny zwisuje. Dźakowny přijimuje dary ludźi, kotřiž su při wurumowanju hornjeje łubje stare wobrazy, dokumenty, dia-wobrazy abo samo filmy namakali.
Bosćij Handrik wěnuje so ze swojej kameru hižo wjele lět Radworskej wosadźe. Kóždy cyrkwinski wjeršk wón w běhu lěta dokumentuje. Legendarny je tež jeho kóždolětny film wo Radworskich křižerjach, na kotryž so tući hižo na swojim swjedźenju tydźeń po jutrach wjesela.
