Wojerecy (KD/SN). Nimale 20 milionow eurow spěchowanja z fondsa za strukturnu změnu je za ponowjenje Wojerowskeje Łužiskeje hale zaplanowane. Dźěła na w lěće 1984 přepodatym kulturnym domje pak budu hakle pozdźišo zahajić. Přičina su personalne wuskosće w Choćebuskim planowanskim běrowje Richter Altmann Jyrich, rozłoži jednaćel Łužiskeje hale Dirk Rolka. Architekturne přede­wzaće swoje nadawki tuchwilu w połnym wobjimje spjelnić njemóže. Tohodla je twarski knjez předewzaća – Wojerowske hospodarske zawody – Choćebuskemu běrowej nadawk wupowědźił a nětko za hinašim planowanskim běrowom pyta.