Budyšin (CS/SN). Zajim za knihu awtora a publicista Eberharda Schmitta „Čornobóh pola Budyšina a susodne hory“ wutoru w Budyskej měšćanskej bibliotece bě přewšo wulki. Někotrych zajimcow dyrbjachu samo domoj pósłać. W Bu­dyšinje rodźeny a nětko w Biskopicach bydlacy Eberhard Schmitt je hižo wja­core domiznowědne knihi wozjewił. We witrinje sy je wutoru wobdźiwać móhł a w měšćanskej bibliotece móžeš je ­wupožčić. Jeho najnowšu twórbu ­sej ­kupić njebě jednore, přetož nakład je snadny. Nakładnistwa, kotrymž je awtor knihu poskićił, jeho wotpokazachu. Tuž wuda knihu w swójskim nakładźe. Bjez małeje pjenježneje podpěry Kamjeni­čanskeje krajneje direkcije tež to njeby móžno było.