Město Běła Woda financuje trěbnu modernizaciju lodohokejoweje hale
Běła Woda (AK/SN). Ze swojim wčerawšim rozsudom je so Běłowodźanska měšćanska rada k přichodej lodohokejoweho mustwa Łužiske lodohokejowe liški (EHC) w druhej lize profijow wuznała. Z wjetšinu 20 hłosow schwali wona zakładne wobzamknjenje za modernizowanje tamnišeje lodohokejoweje hale. Konkretnje stej to dwě přetwarjenskej naprawje: Wokoło hrajnišća ma so fleksibelne wobłoženje zatwarić a hala ma so z LED-wobswětlenjom wuhotować. Wobě stej trěbnej, zo by so Liškam za přichodnu sezonu 2025/2026 licenca za lodohokejowu ligu přizwoliła. Radźićeljo wobzamknychu, wobě předewzaći do přichodnych etatowych wustawkow 2025 zapřijeć. Maksimalne zaplanowane su kóšty we wysokosći 775 000 eurow.
