Zašły tydźeń překwapi powěsć, zo je Serbowka škotowy turněr dobyła. Budyšanka Sonja Krječmarjowa je w Lejnje mjez 29 mužemi dopokazała, zo wě derje z delenkami, klanku, krawcom a dalšimi wobchadźeć. Wšitko to su słowa, kotrež serbscy škotowarjo samozrozumliwje wužiwaja, byrnjež přiručka abo zapis specielnych zapřijećow njebyła. Budyšanka je hižo jako dwanaćelětna wot nana a bratra škot hrać nawuknyła. „Moja mać nochcyše sobu hrać a tuž staj wonaj mje přerěčałoj. Prěni čas sym jenož přihrała.“ Přiwšěm so dźensa 72lětna rady na tónle čas dopomina. Wšako běše swójbne škotowanje stajnje dowolowa zabawjaca zaběra. „Pozdźišo sym z kolegami a šulerjemi na Budyskej Serbskej rozšěrjenej wyšej šuli kaž tež na Serbskim gymnaziju škot hrała. To pak dźeń a bóle woteběra, dokelž nimaja mnozy hižo chwile. „Tuž wjeselu so kóždy měsac znowa na škot“, wona rjekny. Mjeztym je wona w tymle kruhu hižo dźesać lět jenička aktiwna žona. Sonja Krječmarjowa ma škot za přewšo dobry sport. Rady by wona w seniorowym škotowym kole dalše žony witała.