Konrada Zusowy kompjuterowy muzej we Wojerecach přihotuje tuchwilu wustajeńcu pod hesłom „Storyje naslědnosće“. Z tym chce zarjadnišćo na dźeń a bóle so pozhubjowace přirodne resursy na swěće a na globalne wužadanja w tutym zwisku skedźbnjeć.
Wojerecy (AK/SN). „Pućowanska wustajeńca, kotruž chcemy štwórtk, 6. februara, w 17 hodź. wotewrěć, wopřija 22 fotow a widejow wo kompleksnych wzajomnych zwiskach mjez resursami, wobswětom a towaršnostnym wuwićom.“ Tole rjekny zamołwity za zjawnostne dźěło a marketing muzeja Fabian Specht. Nimo póndźelow je wosebita wustajeńca hač do 30. měrca w foyeru muzeja wšědnje wot 10 do 17 hodź. darmotnje přistupna.
