Brězowka (AK/SN). Dźěła na narunanskim nowotwarje gratownje dobrowólneje wohnjoweje wobory w Brězowce so ke kóncej chileja. Tole podšmórny wjesnjanosta Sebastian Bertko (njestronjan) štwórtk na posedźenju radźićelow gmejny Dźěwin, kotrejž Brězowka přisłuša. „Jako gmejna chcemy gratownju ručež móžno a swjatočnje wobornikam přepodać“, wjesnjanosta wuzběhny. Dokładny termin hišće jasny njeje.

Wjele małych kročelow je hišće trjeba, znazorni Brězowski nawoda wohnjoweje wobory Olaf Hanusch w swojej rozprawje. Aktualnje maja 39 aktiwnych wobornikow, 13 staršich čestnych kameradow a 20 šulerjow w dźěćacej a młodźinskej wohnjowej woborje. Loni mějachu dwanaće zasadźenjow z dohromady něhdźe 220 hodźinami. „Znajmjeńša 100 hodźin smy do wokrjes­neho wukubłanja inwestowali. Wone drje płaći wjele mocow, je pak prawy puć“, wuzběhny Hanusch a doda: „Dźakowano wukubłanju směmy so z dru­himi woborami na přikład w Ha­morskej milinarni abo w Běłej Wodźe zasadźić“.