Njeswačanska gmejna dyrbi přichodnje hišće zlutniwišo hospodarić

Njeswačidło (JK/SN). Zo so Njeswačanskej gmejnje hladajo na finančne poło­ženje hubjenje dźe, wo tym su Serbske Nowiny hižo wjace króć pisali. Nětko je doskónčnje jasne, zo póńdźe gmejna do konsolidacije a z tym ma jasny nadawk: lutować.

Na wčerawšim posedźenju tamnišeje gmejnskeje rady dźěše mjez druhim wo to, hač je lěpje, gmejnske wopłóčki dale w swójskej režiji wobhospodarić abo so jednomu ze zaměrowych zwjazkow w susodstwje přizamknyć. Hladajo na konsolidaciju maja nětko wužadacy nadawk, wo tym wotwažować, kotra warianta je hospodarsce efektiwniša a gmejnje najmjenje wudawkow zawěsća. Klětu ma gmejna tak a tak popłatk za wopłóčki znowa ­kalkulować a z tym bychu dotalne wudawki jako zakład wzali. Z přizamknjenjom k jednomu ze zaměrowych zwjazkow za wopłóčki njebychu na žadyn pad lěpje stali. Wjacori radźićeljo wuprajichu so tuž za to, zo gmejna wopłóčki dale w swójskej režiji wobhospodarja.