Štomy kaž lipa, hrab, dub a klon kaž tež wrjós polěpšeja mikroklimu

Njebjelčicy (SN/MiR). Zymskej měsacaj spočatk lěta stej dobry čas za wobrězowanje štomow a wuswětlenje lěsow. Njedaloko Pěskec bu tele dny poměrnje wulka přestrjeń předźěłana. „To běše trjeba, dokelž je ležownosć blisko pěskoweje jamy chětro sucha a tam su přeco zaso chójny wotemrěli“, rjekny Michał Zahon, zamołwity za rewěr Worklecy w lěsnym wobwodźe Hornja Łužica a doda, zo „spadki dale a bóle pobrachuja.“ Suchoty dla jehlinowcy dosć žiwicy njetworja, kotruž k wotwobaranju skórnika trjebaja. Zo by skórnik mjenje škody nadźěłał, su w našich kónčinach wosebje włóžne zymy a nalěća z wjele spadkami trěbne. „Te pak nimamy a tuž skórnik štomam dale škodźi.“ Zo by so tale situacija w přichodnych lětach změniła a polěpšiła, so wobsedźerjam lěsa doporuča, jón do měšanych lisćowych lěsow přetworić. „Wob­sedźerjo lěsow steja před nowym wu­žadanjom. Wuměnjenja, kotrež klima předpodawa, so tak změnja, zo móže jenož w zmysle lěsneho wobsedźerja być swój lěs předźěłać“, tak Zahon.