Ćisk (JT/SN). Hdyž so póstniski čas nachila, so mužojo w Ćisku hižo wjacore generacije na tak mjenowane póstniske piwo zetkawaja. Něhdy činjachu to často popjelnu srjedu. Mjeztym je za to jedyn z kóncow tydźenja do toho rezerwowany. Tak tež minjenu sobotu w Ćišćanskim „Zelenym wěncu“. Nimale sto muži bě tam přeprošenje wjesneje rady sćěhowało. Wjesny předstejićer Jens Zahrodnik składnosć wuži a na wjesołe a mjenje wjesołe podawki zašłeho lěta zhladowaše. Mjez druhim porěča wón wo tym, što su we wsy zdokonjeli, štó je zemrěł a kotre nadawki maja wobydlerjo lětsa zmištrować. Wobšěrnje informowaše wón wo předwidźanym projekće noweho serbskeho rěčneho a zetkawanskeho centruma, kiž ma w Ćisku nastać. W nim změja pěstowarnja, serbske dźěćace towarstwo­ a młodźinski klub nowy domicil.