Kamjenc (UM/SN). Město Kamjenc chce bywše hejtmanstwo (Amthauptmannschaft) na Cyrkwinskej hasy kupić. Tole je měšćanska rada na jednym ze swojich zašłych posedźenjow wobzamknyła. Kaž z předłohi wuchadźa, je wobsedźerka objekt za 202 000 eurow poskićiła. To drje tak mjenowanu wobchadnu hódnotu přesahuje, z wotpowědnym spěchowanjom pak móhło město tole wurunać.

Z twarjenjom by so rumnostna situacija měšćanskeho zarjadnistwa polěpšiła. We měšćanskotwarskim wuwićowym koncepće z lěta 2021 rěka, zo njeměło město jeničce radnicu ponowić, ale zarjadnistwo tež do bywšeho hejtmanstwa rozšěrić. Tam měli so předewšěm tajke posłužby zaměstnić, kotrež wobydlerjo bjezposrědnje wužiwaja. Z tutym postupowanjom město swoju strategiju pokročuje, wuznamne twarjenja z tym zachować, zo je w zajimje zjawnosće wužiwaja.